'n Skaal vir die meting van empatiese begrip

Abstract

Daar kan min twyfel wees dat 'n sekere mate van empatiese begrip grondliggend is aan alle suksesvolle terapeutiese situasies en ander interpersoonlike verhoudings wat konstruktief en opbouend is. Daar word tot die gevolgtrekking gekom dat 'n deegelike kennis van die aard van empatie noodsaaklik is. In 'n kort teoretiese bespreking word die volgende aspekte van nader beskou: die verskillende betekenisse wat aan die begrip geheg word; die verskille en ooreenkomste tussen empatie en verwante begrippe soos simpatie, identifikasie en projeksie. 'n Geldige meting van empatie kan van groot betekenis wees. Op grond van 'n kritiese evaluering van die vyf basiese metingsbenaderings tot empatie, kan daar gesê word dat die verskillende metinge nie een onderliggende konstruk verteenwoordig nie en dat skaalmetinge, ondanks die kritiek daarteen, van groot praktiese betekenis is en nog steeds die aanvaarbaarste van al die meetinstrumente is. 'n Empatieskaal met voorbeelde van die verskillende vlakke van die skaal, sowel as die skaal se nagevorsde psigometriese eienskappe word gegee.