Përgatitja mësimdhënësve para shërbimit në kosovë: sfidat dhe mundësitë

Abstract

Ky studim shqyrton programet universitare për përgatitjen e mësimdhënësve para shërbimit në Kosovë. Përdor qasjen cilësore në hulumtim, modelin studim rasti, për analizë të Programit Fillor dhe Programit Master për Mësimdhënie Lëndore në Fakultetin e Edukimit në Prishtinë. Janë shqyrtuar aspektet e ndërlidhjes së përshkrimeve të programeve te studimit dhe të kurseve të programeve, me qëllimet dhe rezultatet e pritura të programeve të studimit, me kompetencat për mësimdhënës dhe kërkesat e kurrikulës së bazuar në kompetenca. Pjesëmarrës në studim përmes intervistave me shkrim ishin 5 edukatorë të mësimdhënësve dhe 11 mësimdhënës fillestarë (1–2 vjet përvojë në mësimdhënie). Të dhënat cilësore të mbledhura janë analizuar përmes metodës së analizës tematike. Gjetjet tregojnë se Programi i studimit për arsim fillor dhe Programi Master për mësimdhënie lëndore, përfshijnë elemente nga fushat kryesore të zhvillimit të kompetencave të mësimdhënësve, me dominim të traditës në përmbajtje akademike. Mënyra se si janë integruar kërkesat dhe risitë e kurrikulës së arsimit parauniversitar në përmbajtjet e programeve për mësimdhënës të ardhshëm, akoma nuk reflekton përfarim të duhur të programeve me kontekstin e shkollës dhe me nevojat e mësimdhënësve fillestarë. Gjetjet e studimit tregojnë për nevojën e reflektimit institucional ndaj zhvillimit të programeve dhe syllabuseve lëndore, për të siguruar ndërlidhje të qëndrueshme me kompetencat për mësimdhënës, me kërkesat e kurrikulës shkollore dhe temat kroskurrikulare me interes për shoqërinë dhe gjeneratat e ardhshme. Rekomandimet e nxjerra nga ky studim mund të shërbejnë si bazë për studime të mëtejme, rishikim të politikave të sistemit për përgatitjen e mësimdhënësve të ardhshëm dhe të programeve për mësimdhënës para shërbimit, me qëllim që sistemi për përgatitjen e mësimdhënësve të reformohet dhe të sigurojë përgatitje cilësore të mësimdhënësve të ardhshëm.