Присуство на анти-ТФ4/хепарин антитела кај пациенти профилактички третирани со еноксапарин после ортопедски оперативен зафат

Abstract

Хепарин-индуцираната тромбоцитопенија (ХИТ) е предизвикана од антитела кон тромбоцитниот фактор 4 (ТФ4)/хепарин комплексот. Таа значително го зголемува ризикот од крвавење и тромбоза кај пациентите, што е особено есенцијално во постоперативниот период. Во оваа студија ја проценуваме стапката на сероконверзија на анти-ТФ4/хепарин антителата кај пациенти со ревматоиден артритис и остеоартритис по имплантација на протеза на колк или колено лекувани профилактички со еноксапарин. Целта на истражувањето беш да се процени ризикот од хепарин-индуцирана тромбоцитопенија преку евалуација на индукцијата на анти-ТФ4/хепарин антителата кај пациенти со ревматоиден артритис и остеоартритис по имплантација на протеза на колена или колк, лекувани профилактички со еноксапарин. Материјал и методи: Беа испитани 36 пациенти, на возраст од 18 до 80 години, по имплантација на протеза на колк или колено, лекувани профилактички со еноксапарин. Пациентите беа поделени во две еднакви групи, односно пациенти со ревматоиден артритис (РА) и пациенти со остеоартритис (ОА). Пациентите беа следени за време на хоспитализацијата на Клиниката за ортопедски болести за појава на ХИТ. Во два наврата беше земена венска крв, од периферна вена, за имунолошки иследувања. Прв пат тоа беше направено пред почеток на лекување со еноксапарин, а втор пат постоперативно, 10 дена по оперативниот зафат. Беа нотирани демографски податоци, анти-ТФ4/хепарин антитела, седиментација на еритроцити (ESR), CRP, RF, CCP, ANA, појава на ХИТ. Резултати: Немаше сигнификантна разлика во вредностите на анти-ТФ4/хепарин кај пациентите со ОА и РА предоперативно. Стапката на анти-ТФ4/хепарин антитела кај пациентите со РА беше сигнификантно пониска од онаа кај пациентите со ОА (7,14% наспроти 27,27%, р=0,034). Немаше сигнификантна поврзаност на вредностите на анти-ТФ/4 антителото со вредностите на ESR, CRP, RF, CCP или ANA. Заклучок: Резултатите укажаа на намалена инциденција на анти-ТФ4/хепарин антитела кај пациентите со РА во споредба со оние со ОА. Ова укажува дека постои разлика во анти-ТФ4/хепарин имуниот одговор кај пациенти со РА наспроти оние со ОА, профилактички лекувани со еноксапарин, по ортопедски оперативен зафат за имплантација на протеза на колк или колено.