İŞ YERİNİN VƏ PERSONALIN İDARƏ EDİLMƏSİ NƏZƏRİYYƏSİ

Abstract

Ümumiyyətlə, hər hansı bir iş yerinin effektivliyi həmin iş yerini təşkil edən şəxslərin keyfiyyətinin ilkin və birbaşa funksiyasıdır. İş yerlərinin üzvlərinin bilikləri, bacarıqları və öhdəlikləri birlikdə iş planlarının hazırlanmasında və həyata keçirilməsində, həmçinin məhsul və xidmətlərin çatdırılmasında ən mühüm amili təşkil edir. Nəticə etibarı ilə, idarəetmənin personal funksiyası olan işçilərin cəlb edilməsi, təşkili, hər bir cəhətdən inkişafı və motivasiyası baş direktordan tutmuş birinci səviyyəli rəhbərə qədər idarəetmənin bütün səviyyələrində mühüm yer tutur. İş yerinin personalı idarəetmənin ən çətin obyekti kimi qəbul edilir. Maddi aktivlərdən fərqli olaraq, insanlar müstəqil şəkildə qərar qəbul edə və onların işi üzrə qpyulan tələbləri qiymətləndirə bilərlər. Həmçinin, heyət hər bir üzvünün öz maraqları olan və idarəetmə təsirlərinə çox həssas olan bir kollektivdir və onların reaksiyalarını əvvəlcədən təxmin etmək çox vaxt çətin məsələyə çevrilir. Personalın idarə edilməsinin müasir konsepsiyaları və nəzəriyyələri işçinin şəxsiyyətinin artan əhəmiyyətinin tanınmasına, onun motivasiyalarının və istəklərinin öyrənilməsinə, o cümlədən onları düzgün formalaşdırmaq və şirkətin qarşısında duran strateji vəzifələrə, hədəflərə və məqsədlərə uyğun olaraq tənzimləmək bacarığına əsaslanır. İdarəetmə nöqteyi-nəzərindən biznesin əsas məqsədinin qazanc əldə etmək olmasına baxmayaraq, personalın idarə edilməsinin müasir nəzəriyyəsi, konsepsiyası və praktikası təkcə maddi deyil, həm də işçilərin sosial ehtiyaclarının ödənilməsinə böyük həcmdə diqqət yetirir. İş yerinin idarə edilməsi nəzəriyyələrindən ən yaxşı təcrübələri başa düşmək və tətbiq etmək kollektivi müvəffəqiyyətə doğru daha effektiv və funksional şəkildə istiqamətləndirməyə kömək edə bilər. Bu nəzəriyyələrin bir çoxu bu gün iş yerlərinə rəhbərlik etmək və böyütmək üçün istifadə olunan liderlik və rəhbərlik yanaşmalarının yaranmasına səbəb olur və onların içərisindən iş yerinin prinsiplərinə və kollektivin məqsədlərinə ən uyğun gələn strategiyalar müəyyən edilir və tətbiq olunur. Açar sözlər: Personal, İdarəetmə, İş yeri, Effektivlik, Keyfiyyət.