SƏNAYE MÜƏSSİSƏLƏRİNİN AUTSORSİNQ STRATEGİYASININ FORMALAŞMASI VƏ İNKİŞAFI

Abstract

Müəssisələrin gündəlik olaraq fəaliyyətlərini təmin edə bilmələri üçün tələb olunan bəzi xidmətlər, müəssisə daxilində təmin olunmaya bilər və ya yüksək kapital xərcləri tələb edə bilər. Müəyyən sistemləri öz daxilində quraşdırmağı seçən şirkətlər yüksək sabit xərcləri ödəmək məcburiyyətində qalırlar. Autsorsinq şirkətləri isə bir çox şirkətdən aldıqları sifarişləri birləşdirərək nəqliyyat, gömrük və material kimi əməliyyat xərclərini azaldır və dəyişən xərclər olaraq müştərilərinə daha çevik və əlverişli şərtlər təklif edə bilirlər. Məsələn: Otellər və restoranlar, yaradılması və idarə edilməsi qəliz və məsrəfli olan paltaryuma məntəqələrinə resurslar ayırmaq əvəzinə daha çox autsorsinqdən istifadə etməyə üstünlük verirlər. Hazırda autsorsinq strategiyasından bir çox sahələrdə sıxlıqla istifadə edilir. Bu strategiyadan istifadə edilən sahələrə informasiya texnologiyaları, müştəri xidmətləri və çağrı mərkəzləri, insan resursları, marketinq və reklam, səhiyyə və tibbi xidmətlər, təhsil müəssisələri, dövlət qurumları, həmçinin nəşriyyat kimi bir neçə sahələri misal göstərə bilərik. Dünya miqyasında autsorsinq strategiyası son illərdə böyük artım tempi nümayiş etdirir. Gün keçdikcə dövlət, həmçinin özəl müəssisələr və xidmət təminatçıları autsorsinqin faydaları haqqında daha çox məlumatlı oldular və bu strategiyanı daha geniş şəkildə qəbul etdilər. Bütün dünyada autsorsinq səmərəliliyi artırmağa, təcrübə həmçinin rəqabət üstünlüyü əldə etməyə kömək edir. Bununla belə, autsorsinq müqaviləsində qeyd olunan bəndləri diqqətlə idarə etmək və tələblərə riayət etmək, eləcə də təhlükəsizlik və məxfilik tədbirləri görmək çox vacibdir. Açar sözlər: autsorsinq strategiyası, sənayedə autsorsinq, autsorser